Khutbah Idul Fitri Bahasa Makassar

Allahu Akbar 9 x Wallilahil Hamdu

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهْ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَلاَ مُضِلَّ لَهُ وَمَنْ يُضْلِلْهُ فَلاَ هَادِيَ لَهُ. وَأَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ. يَا أَيُّهَا النَّاسُ أُوْصِيْكُمْ وَإِيَّايَ بِتَقْوَى اللهِ فَقَدْ فَازَ الْمُتَّقُوْنَ. قَالَ تَعَالَى: يَا أَيُّهاَ الَّذِيْنَ ءَامَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ. قَالَ تَعَالَى: يَا أَيُّهَا النَّاسُ اتَّقُوْا رَبَّكُمُ الَّذِيْ خَلَقَكُمْ مِّنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالاً كَثِيْرًا وَنِسَآءً وَاتَّقُوا اللهَ الَّذِيْ تَسَآءَلُوْنَ بِهِ وَاْلأَرْحَامَ إِنَّ اللهَ كَانَ عَلَيْكُمْ رَقِيْبًا. يَا أَيُّهَا الَّذِيْنَ ءَامَنُوا اتَّقُوا اللهَ وَقُوْلُوْا قَوْلاً سَدِيْدًا. يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوْبَكُمْ وَمَنْ يُطِعِ اللهَ وَرَسُوْلَهُ فَقَدْ فَازَ فَوْزًا عَظِيْمًا.

أَمَّا بَعْدُ؛ فَإِنَّ أَصْدَقَ الْحَدِيثِ كِتَابُ اللهَ، وَخَيْرَ الْهَدْيِ هَدْيُ مُحَمَّدٍ صَلَّى الله عَلَيْهِ وَسَلَّمَ وَشَّرَ الأُمُورِ مُحْدَثَاتُهَا وَكُلَّ مُحْدَثَةٍ بِدْعَةٌ وَكُلَّ بِدْعَةٍ ضَلاَلَةٌ وَكُلَّ ضَلاَلَةٍ فِى النَّارِ. اَللَّهُمَّ صَلِّ وَسَلِّمْ عَلَى نَبِيِّنَا مُحَمَّدٍ وَعَلَى آلِهِ وَصَحْبِهِ وَمَنْ تَبِعَهُمْ بِإِحْسَانٍ إِلَى يَوْمِ الْقِيَامَةِ.

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Anne Allowa taena bukuang kana masarro la’birangngang ia akkulle nipa’mole-mole passangngallinna pappakalompao siagang pammuji mange rikaraeng kaminang kammayya iami antu karaeng Allahu Ta’ala taena karaeng akkulle ni somba, nikussiangngi, nikamalakkang, nipangonro-nganroi ri allo bangngi massingalinna iaji riayai tallasallatta, riayai matenta ri iya tongki sallang nipoterang punna ta’rapi ero kalompoanna.

Sallang pappasalama saniasa nikiring mange rijunjungang na’bitta Muhammad SAW, Ia Na’bi a’jari  suro mange ritompo’na linoa anne taena maraeng poro ampacinikangki singara siagang pappijo’jo mange rikasalamakkanga baji ri lino la’bipa ia ri allo ribokona Allahhu Ta’ala

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Anne allowa niaki ritampa le’baka nipassamaturuki nisangkanai, nipa’bulo sibatangngi angkana anjoeng tawwa assibuntu-buntulu julu bangsa, julu agama, sicini-cini, sibija sipammanakang appakajai takabbere pammuji pappakalompo rikaraeng Allahu SWT.  Ampasituruki kanana Allahu Ta’ala ilalang ri Qur’an mala’biri’na S.Al-Ahzab 41

Battuanna:Ee sikamma tumatappaka angngurangiki mange ri karaeng Allahu Ta’ala siagang pangngurangi sijai-jaina nasila’bu la’buna awattua. Naki sa’bu arena karaenga ma’mole-mole nasaba iami karaeng angkamaseangki siagang malaeka’na ampappala doangngangki nakissulu battu rikakaperanga naniyamo cahaya ilalang ribarambanta  

Anne allowa battuki ribundu lompowa ambunduki hawa nafsuta sibulangki sallonna massing Allati kalenta baji’kana, lamma nyawa, lamma ati lammoro passare-sare, ampelaki sifat tampowa, takabboro’tinggi langgaya sifat eroka nikana nipela’mi sipa’kodiya, nibokoimi pappisangkaya, pang gaukang baji’mami nigaukang passuroang nilaku-laku,sipa boyaimi baji natenamo naki sipaboyang kodi, nakammayammi anne antama rigolongang tumatappaka siagang malla rikaraenga anggappa predikat “la’llakum Tattakun” singkamma najanjiangki Allah Ta’ala ilalang ri kitta mala’birina ilalang risurah Al-Baqarah ayat 183:

Artinya: Ee sikamma tumatappaka niwajikkangi mange rikatte ngaseng untuk appuasa sangkamma todong  niparentangi mange ri ummat le’ba lalowa dasi na dasi naki antamaja rigolongang tumallaka

Anne allowa battuki ribulang rumallanga appuasa, appakajai amala baji’ appasulu’sakka, lanynyimaki ridosa kammatong lanyinynna ana berulassuka battu ribattanna anronna.

Inai-nai appuasa angentengani sambayang, akkusiang siagang tappa na are relanna Alla Ta’ala.Lanyingi dosana sangkama ana beru lassuka ribatanna anronna

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Mingka anne allowa assibokoimaki bulang rumallanga bulang malanynyinga, bulan tarraka ribarakka abbokomi tamammaliang Kadde’ji kilangngere’ sa’ranna bulang rumallanga appalakkana rikatte ma’nassa rerai atinta,dinging-dinging pa’maitta lari je’ne matanta kamangei rikatte appalakkana

Assalamu alaikum  ya-Ayyuhal muslimin wal muslimat

Assalamu alaikum Ya-Ahlus siyaam

Assalamu alaikum Ya-Ahlut Tarawih

Assalamu alaikum  Ya-Ahluz zakat

Assibokomaki anne mingka tenaja kisassa’ lalang katarompoki ripassawallang, rasiki ripammetengang kagannaki puasata, sukkuki tareweta, loei sambayang lantang bangnginta nalappasa zakka pitaratta lassicinikki sallang ridallekanna Allah Ta’ala.Kamma rinakanana na’bita

Farhatani farhatani  Indalliqai Rabbi

Naiya tau puasaya langgappai rua kassanangngang sannangisawattunna nagesara puasana sannang tongi riwattu assabuntuluna Allah SWT

Sambayanta a’jari sa’bi, ka’do danniarita a’jara kanrena je’ne inung siagang jakkatta a’jari pa’lalangang ripadang mahsyar silamaka matanna Allowa tallantena riulunta.

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Bullang rumallanga mange tongi ritau mongkereka battu ri passoroanna Alla Ta’ala appala’kana:  Allampama anne kurangsiri’ ,kurang malla taena pangngali’ rannumaki anne alloa katenamo kikasirikang taena tommo kisiri-siri karata mi tawwa anganre anginung  riwattu allowa

Anne allowa sannaki rannunu mingka sanna cilakata rassiko rikarugiang tarompoko ri sassa lalang, nisungkei suruga mingka naraka napammantangi naki’a’jari papparinra rinaraka nibalambang ri tompo’na

Nampapi nasassala kalenna tau tenaya naero anggaukang pakkusiang ilalanganna anne bulanga tau niaka ansia-siakangi rumallanga ripassabakkang kasibukanna angngondangi usaha katalassang linona.  Sassa lalang tena na le’ba riolo, riboko tompi manjina’ mappilannassi

Kupakainga’kki kammaya tompa ribattang kalengku angkanaya tea laloki angkanai sangnging linoji ni usahai, doeji kiboya, barang-barangji kipatambung.  Nampa kikaluppai karaeng ampa’jariaki ansareaki dalle kiu’rangi pappasanna karaeng Alla Ta’ala

Kiboyai katallasang linota ningka teaki kaluppai kata lassang ahiratta.

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Ingakki anne lino lani bokoiji ahira pasti lani mangei Ingakki angkanaya jai tau attallasa riolonganta a’mate-mateang angkaresoi lino mate anjo mange tena naerangi barang-barangna

Bajiki kalumanyanyanga, empo sunggua, eroka a’balanja nania bija tabija battu ngaseng attimporong

Kodi kasi asia eroka nampa tena kamanna bija tea ngaseng appattau, mingka ia kala’biranga tenaja nappoko’ battu rinikanaya pakkalumanynyangngang tena tonja nappoko’ battu riempoanga iareka jabatanga, mingka appokoki battu ritappaka ri Allah Ta-ala

Naiya katunanga tena nappoko battu ripakkasi-asianga, appokoki battu ritappaka, kalumanynyangki, nia empoanta mingka a’bokoki riparentana Allah Ta-ala niakki rikatunanga riallo riboko sallang. Kasi asiki mngka niakki akkusiang tunaki rilino mingka la’biriki riallo riboko sallang.

            Ikambe tau kalumanynyanga, punna eroki la’biri rilino, la’biri ri-ahera gau baji kigaukang, sambayang kilaku-laku naki pakajai sambayang barajamatta kima’nannungang rimasigi musallata.

            Ikambe tau kasi-asia punna teajaki tuna ri-lino tuna ri-ahera anggaukangki parentana Allah ta-ala tunga-tungala wattu. Nasaba mana tena kissambayang kasi-asijaki bajikangngang assambayangmaki tunaki rilino mingka la’birikki ri-ahera sallang, insya Allah.

            Ikatte tumapparentaya assengi kalenta tunipinawang, nipammanjengi, nipa’la’langi, sungkeangi timunganta tuma’buttata, punna niaki battu  rikatte angngerangi pa’risi’na ansoengi susanna bantui punna gau siratang, ikattemi antu tumapparentaya rapangki jarung, tumabuttata sanrapangi pintala, nakana tau towayya anta’leko jarung namamminawang pintalaka, bajiki anu panraka a’memungi anu kekkeka.

            Ikatte tumabuttaya assengi kalenta tuniparenta kipinawangi ero’na pammarentata ilalang rikabajikanga salama tena nassibokoi ero’na agamaya.

            Se’rea pa’rasangang punna assamaturuki tumapparenta, tau kalumanyyang, tau caradde siagang tau kasi-asi lewai pa’rasanganga, ammentengi pabbuttanga, nipaturungi barakka’na linoa nani sungkei barakka’na buttaya anjari  wassele’na pammarianga.

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

            Ikatte niaka ammallaki tau toa, teaki ma’ring kiga’gara’ anronta iareka anggeta, kipagalinta biberetta, kikanammi eroka kikanang nakigaukang eroka kigaukang, tamangngali-ali tamassiri-siri tanasikko’maki riada’ tau kammayyami anne tau doraka ritau toa tau cilaka sallang riallo riboko.

            Kipahangi baji’-baji angkanayya manna ga’gaki kigammara’ tinggi pangngasengang  siagang empoanta #kabbala’ tanakanre bassi punna dorakaki ritau toa, tanrasayyaki salama tammuntulu’ singara’ niboyai dalletta iraya mingka ilauki ammumba, nakana Nabbita

            “Rellana Allah ta-ala battu rirellana tau toata siagang pangngu’ranginna Allah ta-ala battu ripangnguranginna tau toata”.

            Angngu’rangiki sa’ribattang riwattunta ilalang battang nikimbolong 9 bulan 10 allo nierang mange-mange, ammatta attinro tamabaji, angnganre tamassipa nilassukangki assulu sidallekangi tallasa iareka mate, naiya manggeta napassabaki rannu natenamo naassengi kasappoanga amboyangki tallasa, sassang napalampang nasassang todong nakabattuang mingka tena nale’ba akkunraring la’bipa iya lanre rikatte na iya harapanna lompoki nai nakijari tau naki matu-matu riparanta rupa tau; mingka apa kajariang kagassing lompoki  napa’risi nyawaja kibalassiang tautoata.’ Air susu dibalas air tuba ‘ Rasullullah naancangi tau kammayya anne antamapi ontayya riso’bolo  jarunga nampa  antama’ suruga tau dorakaya ri tau toa .Bahkan narampai nabbita

            “Inai- inai tau doraka ritau toana ma’nasa antu  tau najallakangi kalenna antama rinaraka

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

Mingka parallui niasseng angkanaya nia todong ana’ dorakai  ritau  toana napassabaki battu ritau toana tonji nasaba salai batena andidi’, salai batena angngajara bahkan tena nagaukangi kawajibanna mange ri ana’na  emmangka pangajarang  ripangaseang sikola, ripangngaseang agama iareka pangadakkang. Mingka rikamma-kammayya anne taenamo alasan talandidiki ana-anaka’ nasaba alhamdullilah riniya’na programna  pammarentata ri butta Gowa melalui perda no.4/2008 ripa’salana nikanaya ‘pendidikan gratis ‘ battuang kana ana’-ana’ sikolaya mulai ri SD/MI sanggenna SMA/MA taenamo nakulle ripaballaki  pa’bayara nasaba pa’bayara’na  natanggommi pammarenta. Nia tommo nikana SPAS [Sanggar Pendidikan Anak Saleh ] Ia ngasami anne parallui Nipa’matu-matu  baji siagang risikamma programna pammarentata.’

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

               Anne alloa, allo pa’jamataengan; allo sipappala popporo sipammoporang rimassing le’bata assi-sala  pa’mai rigau katalasanta, a’jamataeng maki sipammopporang, le’baka le’bami manna mamo naki le’ba assibuangi mata poke’ Assite’ba berang kalewang, siunteang pangngulu badi  angsungkei kancing bajunta namassing kite’de barambanta nampa kikanang ero’nu ero’ku todong apaseng katenamangkaja ki’le’ba  nigaukang anne kammayya napassabbaki besere’ ana’-anaji iareka kana ta’lero’ji, passala barang-barang, sisala pammetanga iareka pammileang riallo pannodokkanga, a’jama taengmaki naki sipammoporang teaki ta’galli angkanaya eja tompi seng na doang. katenaja antu nangerang kabajikang, assamaturu’maki ikatte tau Bontoreaya naki’ ta’gala pappasangna tau toata ‘manna ronrong linoa gesara butta maraeng  ikatte tau Bontoreaya tetapjaki siama-ama nipasituru rikellonna tau rioloa  ;  Ikattepa assamaturu, pakabaji boritta  naki rambangan assomballi mate’nea teaki napara ikatte sigea sigenra-genra-na’lewa lino na aman pa’rasanganta’.  Asama turumaki’ naki bulo sibatang accera sitongka-tongka. Appakabellai  nikanaya passisalang-salang assampa parasangang    tasipakana, siampi balla tasipattau, assigette gantiro tasiasseng , tau kammayya anne tau nicalla rikaraeng Allahu ta-Ala siagadang ri na’bina situru’ rikananna

               ‘’Taena natappa se’rea rupa tau tenayya nangai sarebattanna kammatodong nangainna batang kalenna’’

               Rihaddese maraenga narampei

               ‘’Tiai golonganku tau lompoa natena nahormati tau caddia  tiai tongi golonganku taucaddia natena  napakalabbiri tau toayya’’

Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

               Anne alloa nia tommo tau rannu  nasaba assicini asengi bija pammanakanna salloa nakanakuki salloa napakkuring -kuringang niasengmaki assito’ro mata assijangjang kitamuri naerang kakkala te’ne pa’mai.

               Mingka ri’pasimbangenna tau rannua nia tommo anne alloawa  tau rera atinna dinging-dinging  pa’mai’na tassunge’nge’ ammatti’ je’ne’ matanna anggalluru ribarambangna iamintu

ana’-ana’ makukanga nibokoi  rianrong iareka ri mange punna   accinimo    parangna  ana’ana’  nirenreng  rimanggena nirurungnga  ri amma’na akkanami  atinna  ka’de  attalassa injapi anrong manggeku narenreng narurungngang   kamma  tonga  anjo .

tau  towaya ia mateamo ana jari taunna  iareka nia ana’ na a’lampa bella anjo mange nisimbang ribulu’ nipisalla ritamparang napassabakkang  amboyai  tallasa’na iareka angngondang  pangngassengang taniasseng antumae ritallasa allo-allona, bassoro’na iareka cipuru’na, paseha’na iareka pagarrinna, bahkan tallasa’na iareka matenna punna accinimo tau toa anrenreng iareka sirurungang ana’na, nakana tommo atinna ka’de attallasa inja anakku iareka niaki battu rilampanna kurenreng, sirurungang, sileporang kamma injapa anjo

Tau kamateanga ri bura’ne iareka ribaine punna accinimo tau assirurungang sikalabine nakana tommo atinna ka’de para attallasa inja a’rurung-rurung kamma tomma anjo sita’gala lima assiremba-remba naruntu ngasemmi nanawa-nawa riwattunna sileporang sikalabine

            Allahu Akbar 3X walillahil  hamdu. Tau toa Sari’battang tunipakala’birika ngaseng niaka hadere

           Ikatte tau toa ammallakia ana’ tau lolo tau rungka teaki sayu rianatta nasaba tallui antu saba’ akkulle ammanraki, makase’re pasayua, makarua ammalasaka makatallau kodibawaya iareka bawa tanisingkolo       

Punna sambayang kisayu panrakki, teaki  ta’galli saribattang  angkanaya  ejatompi   seng  na doang , tussambayang  mate tong, tau tak sambayang  mate tong . taussambayang antu  tena tonja  nattantu  salama’na, kanajawab  tongi  antu  passambayanga  angkana inakke  assambayang  tena nattantu salamaku, ingka ikatte  tena  kissambayang  attantumi  tasalamatta  kapunna  nia tau lanikamaseang  pasambayangarong  ni kamaseang  nampa tau tenaya nasambayang  punna  paeng  lanikamaseang .   

            Punna  ana’ rungka  kisayu  ammanraki  napunna  taulolo kisayu  nipanraki, teaki  pakei   istilayya angkanaya  ‘’itu soal  biasa ‘’ nasaba  biasami antu  ammanraki,  nikanayya  soal biasa natenamo nisadari  perlahan tapi pasti  naerangki mange  ri kapanrakanga .

            Ikatte tau  lolowa  sanrapangki  bayao  addongko   ricappa  tanru, niserota tu’gurutta ,niberota  ammatunta’  gampangki  reppe  ta’balle  minynya  nataena  rappunganna.  anjo  bura’nea  sanrapangi  kaluku  punna  pintujungja  ammattung  pissalapang  tassambila   taena  nangapa –apa. Singaiki  se’re  baine  se’rea  bura’ne  nale’bamo  a’gau salah  a’jari  pangalamanmi  ri’bura’nea  na’jari  kahancurangi  ribaineya .

            Allahu Akbar 3 kali walillahil  hamdu. Tau toa Sari’battang tunipakala’birika ngaseng niaka hadere

            Kupasangki  sari’battang terutama  batanna  kalengku  nakana  se’rea  tupanrita  inai-nai  a’gau  baji  lanierang  antu  mange   rikabajikanga , inai-naimo  tau  nierang  mange  rikabajikanga  lani  erangi  antama  ri suruga . inai-inai  tau  a’gau  kodi  lani  erangi  mange  rikakodianga  lani  erangngi  antu  antama  rineraka. Suruga  neraka  ikatte   tonji  ampareki  mateki  sallang, langsung  mami  nipammantangi. Assambayangki  kitoba  pakajai  amalatta  eranna  anjaya  bokonna  tau  mateya. Anne lino  pakkaresoang  butta  pa’lamung-lamunga  ri  akherat pi  sallang  nialle  wasselena.

            Teaki  ma’ring  nataba  kananna  tau  toata, sambayanna  passayua  sallina  sakaroloa  erokki  toba  nanalumbaki  matea  tutuki  ma’lepa-lepa,  ma’biseang  ribontoa  tallangki  sallang  nanasakkoki  alimbu’bu, battuangkana  tallasakki  angngondangi rilinoa  anne  taena  namminawang  aheratta  mingka  punna  aherat  kituntu  attantumi  amminawang  linota .

            Allahu Akbar 3 kali walillahil  hamdu. Tau toa Sari’battang tunipakala’birika ngaseng niaka hadere

            Namasarro  upa’mi  tau  niaka  tappa  anggaukang   passuroa  alli-lilia  pappisangka, ammentenna  sambayang, appakala’biri  tau  toa  nabaji  ampe-ampena  riparangna  rupa  tau. Tau  kammayya  anne  lanrasa  kabara  mappakarannu-rannu , nileme-leme  nyawana , niluarriang  kuburu’na  nisungkeang  pa’kebuna  langi  ka assibuntulu   Allah ta’ala  nippasalamaki  ri tetena  shiratal mustaqim  antama  risuruga .

            Namasarro   cilakami  iya  tau niaka  ammongkere  ri  Allah  ta’ala  sangnging  pappisangka  nalaku-laku  nampa  passuroang  naliliang  tangenteang  sambayang, doraka  ritau toa, tampo tinggi langga, kodi  ati’ ero’ nikana , tena  napakataui parangna  tau kalenna  tonji  nakana  tau nakanangi Tussambayang  mate tong  tutassambayang  mate  tong, kikkiri  assidakka  singkamma  dongko  paro  tau  kammayami  anne  lanrasai  kabara  pakamalla-malla ,lani  pasinta  nyawana  rimalakul  maut, ni para-parapa  ri mungkara siagang nakir, nisessa rikuburu’na, nikanrei ribarang-barangna nampa nibalambang sallang ripepe neraka.

            Akhirna sebagai pappasang pannongko rilalanna katu’baku ia a’jari pappakainga risesena tau takkaluppaya limai rupanna tea laloki eroki nabokoi, iamintu:

1.      Tealaloki eroki nabokoi pakeang takekke iamiantu

2.      Tealaloki ero Tealaloki eroki nabokoi bunging ta’mara iamintu

3.      Tealaloki eroki nabokoi bokong tamabari iamintu

4.      Tealaloki eroki nabokoi dongko-dongkokang malacciri’ iamintu

5.      Tealaloki eroki nabokoi sulo tamapa’rang iamintu

Maemaki naki nia appala doang ri Allah Ta-ala barang niajaki nasare umuru mala’bu siagang tubuh masalewangang naki niaja assomaballangi tallasatta ampa’nannungangi pakkusianta assibuntulu rumallang labattua

Amin Ya Rabbal alamin      

بَارَكَ اللهُ لِيْ وَلَكُمْ فِي الْقُرْآنِ الْعَظِيْمِ، وَنَفَعَنِيْ وَإِيَّاكُمْ بِمَا فِيْهِ مِنَ اْلآيَاتِ وَالذِّكْرِ الْحَكِيْمِ، وَتَقَبَلَّ اللهُ مِنِّيْ وَمِنْكُمْ تِلاَوَتَهُ، إِنَّهُ هُوَ السَّمِيْعُ الْعَلِيْمُ. أَقُوْلُ قَوْلِيْ هَذَا وَأَسْتَغْفِرُ اللهَ الْعَظِيْمَ لِيْ وَلَكُمْ وَلِسَائِرِ الْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ. فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

Khutbah Kedua

إِنَّ الْحَمْدَ لِلَّهِ نَحْمَدُهُ وَنَسْتَعِيْنُهُ وَنَسْتَغْفِرُهْ وَنَعُوذُ بِاللهِ مِنْ شُرُوْرِ أَنْفُسِنَا وَمِنْ سَيِّئَاتِ أَعْمَالِنَا، مَنْ يَهْدِهِ اللهُ فَلاَ مُضِلَّ لَهُ وَمَنْ يُضْلِلْ فَلاَ هَادِيَ لَهُ. أَشْهَدُ أَنْ لاَ إِلَهَ إِلاَّ اللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ صَلَّى اللهُ عَلَى نَبِيِّنَا مُحَمَّدٍ وَعَلَى آلِهِ وَأَصْحَابِهِ وَسَلَّمَ تَسْلِيْمًا كَثِيْرًا. قَالَ تَعَالَى: يَا أَيُّهاَ الَّذِيْنَ ءَامَنُوا اتَّقُوا اللهَ حَقَّ تُقَاتِهِ وَلاَ تَمُوْتُنَّ إِلاَّ وَأَنتُمْ مُّسْلِمُوْنَ. قَالَ تَعَالَى: {وَمَن يَتَّقِ اللهَ يَجْعَل لَّهُ مَخْرَجًا} وَقَالَ: {وَمَن يَتَّقِ اللهَ يُكَفِّرْ عَنْهُ سَيِّئَاتِهِ وَيُعْظِمْ لَهُ أَجْرًا}
ثُمَّ اعْلَمُوْا فَإِنَّ اللهَ أَمَرَكُمْ بِالصَّلاَةِ وَالسَّلاَمِ عَلَى رَسُوْلِهِ فَقَالَ: {إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَا أَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا}.
اَللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ كَمَا صَلَّيْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ. وَبَارِكْ عَلَى مُحَمَّدٍ وَعَلَى آلِ مُحَمَّدٍ كَمَا بَارَكْتَ عَلَى إِبْرَاهِيْمَ وَعَلَى آلِ إِبْرَاهِيْمَ، إِنَّكَ حَمِيْدٌ مَجِيْدٌ. اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ، وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ سَمِيْعٌ قَرِيْبٌ مُجِيْبُ الدَّعَوَاتِ. اَللَّهُمَّ أَرِنَا الْحَقَّ حَقًّا وَارْزُقْنَا اتِّبَاعَهُ، وَأَرِنَا الْبَاطِلَ باَطِلاً وَارْزُقْنَا اجْتِنَابَهُ. رَبَّنَا آتِنَا فِي الدُّنْيَا حَسَنَةً وَفِي الآخِرَةِ حَسَنَةً وَقِنَا عَذَابَ النَّارِ. رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا. سُبْحَانَ رَبِّكَ رَبِّ الْعِزَّةِ عَمَّا يَصِفُوْنَ، وَسَلاَمٌ عَلَى الْمُرْسَلِيْنَ وَالْحَمْدُ لِلَّهِ رَبِّ الْعَالَمِيْنَ.
وَصَلَّى اللهُ عَلَى مُحَمَّدٍ وَعَلَى آلِهِ وَصَحْبِهِ وَسَلَّمَ. وَأَقِمِ الصَّلاَةَ